مسلم الركابي
على غير العادة وصل ابو حسون المقهى مبكراً ، حيث كان يأخذ قيلولته في البيت ثم يأتي للمقهى عصر كل يوم ، يبدو ان وضعه مختلف اليوم جلس في مكانه المفضل في المقهى وطلب قنينة ماء بارد واستكان شاي ، بادره صديقه بالقول ،
عيني ابو حسون هاي شنو اليوم طالع اتخبل ، قاط ورباط وسبحة جديدة ، بس لا صرت مستشار واحنه مندري ؟ اجابه ابو حسون ضاحكاً
يمعود يا مستشار ؟ اليوم نريد نروح نبارك للحجي بمناسبة عودته من الديار المقدسة .
رد عليه صديقه مازحاً
يمعود ابو حسون اكعد راحة وين رايح هوسه والعالم كلها رايحه تبارك ، بعدين (منو يعرف افطيم بسوق الغزل) ، انت وقاطك ورباطك ، خايب اكعد ، اجابه أبو حسون ممتعضاً
ليش خويه ، تره الحجي يعرفني كلش زين ولا تنسى الحجي مواعدني بشغلات هواي اني ما اكدر احجيها هسه ، لان تدري احنه نعيش في صمت انتخابي ، ضحك صديقه بصوت عال وهو يردد ، صمت انتخابي ، صمت انتخابي ، بس لتنسه اخذ ورد وياك عيب تروح وايدك فارغة ، يمعود غيرك اخذ طلي ومهوال ايهوس وشباب تردح ومصور يصور ، هذني الشغلات مهمة ويحبهن الحجي ، ومن تروح وايشوف الحجي الورد والمهوال والشباب والمصور راح يرضى عليك ويمشي امورك واكيد اكيد راح ينطيك الي تتمناه ، رد عليه أبو حسون باستغراب شديد
انا اخوك اي والله الشغلة الظاهر ثخينه يخوي ، بس مو مشكلة هذني الشغلات مكدور عليها المهوال موجود هواي عدنه مهاويل ورداحه ومصورين بس المشكلة بالطلي شويه غالي بس ميخالف الشغلة تسوه والحجي يستاهل ، وهله بالحجي الجايب ريحة مكة وياه ، يمعود اتأخرت خلي اروح قبل ليعوفوني الجماعة ، ثيمالا .
وهله بالحجي اليجينه ……. زار مكة والمدينة .
